ဖြစ်ပျက်နေသော ဖြစ်စဉ်များ

သူခိုးပြေးပြီး ဆိုကာမှ
ထိုးကွင်းတွေကို ထမနေနဲ့တော့
မာန်ရေးတကြွကြွ ဟန်ရေးပြ
ပြည့်အရေးမလှတာ ကြာခဲ့ပါပြီ၊

ကျောချသွားပြီ ဆိုကာမှ
ဓမြ ဓမြ ဟစ်ကာ မနေပါနဲ့တော့
ရေတွက်လို့ မရ ခံခဲ့ရ
အံကြိတ်ရတာ များခဲ့ပါပြီ၊

စစ်ပွဲပြီးမှ ဗျူဟာချ
ဖြူပြာကျမှာ ပလူပျံထ
ပြောကြ ဆိုကြ ဝေဖန်ကြ
မိုးလွန်ထွန်ချ ဖြစ်ခဲ့ပါပြီ၊

ဒဏ်ရာများလို့ ထုံနေသလား၊
ကြံရာမရလို့ ဟုန်နေသလား
နောက်ကျသွားတဲ့ သမိုင်းကြောင်းကြားမှာ
တိုင်းပြည်ကတော့ နုံချာသွားပြီ။ ။

ရန်နိုင်ထွန်း (လွတ်မြောက်နယ်မြေ-ကိုရီးယား)